સુરત : દુબઇ ખાતે ચાઇનીઝ કંપનીને ગેરકાયદેસર રીતે પ્રિ-એક્ટિવ સીમકાર્ડ મોકલવાના રેકેટનો એસઓજી પોલીસે પર્દાફાશ કર્યો છે. આ સાથે પોલીસે બે શખ્સોને 192 સીમકાર્ડ લઇ દુબઇની ફ્લાઈટ પકડે તે પહેલા જ ઝડપી પાડ્યા હતા. જો કે, પોલીસે બંને શખ્સો પાસેથી સીમકાર્ડ કબજે કરી તેમની પૂછપરછ કરી છોડી મૂક્યા છે.
મળતી માહિતી મુજબ સુરતમાં એસઓજી પોલીસની ટીમને ગેરકાયદેસર રીતે પ્રિ-એક્ટિવ સીમકાર્ડ મેળવી દુબઇ મોકલવાની પ્રવૃત્તિ કરતી ટોળકીની માહિતી મળી હતી. આ ટોકળીનો એક સભ્ય અન્ય સભ્યને મોટી સંખ્યામાં પ્રિ-એક્ટિવ સીમકાર્ડ આપી તેને દુબઇ મોકલવાની ફિરાકમાં હતા. બંને સુરત રેલવે સ્ટેશન ખાતે સીમકાર્ડની ડિલિવરી કરવાના હોવાની બાતમી મળી હતી. જેથી પોલીસે રેલવે સ્ટેશન ખાતે વોચ ગોઠવી સીમકાર્ડની ડિલિવરી આપવા આવનાર અજય સોજીત્રા અને ડિલિવરી લેવા આવનાર દુબઇના વતની સહદ બાગુનાને ઝડપી પાડ્યા હતા. પોલીસે તેમની પાસેથી એરટેલ કંપનીના 192 પ્રિ-એક્ટિવ સીમકાર્ડ કબજે કર્યા હતા.
પોલીસે અજય સોજીત્રાની પૂછપરછ કરતા તેણે જણાવ્યું હતું કે, તે દુબઇ ખાતે રહેતો હોય અને ત્યાં ઓનલાઇન ગેમ રમાડતી ચાઇનીઝ કંપનીઓ આવેલી છે. આ કંપનીઓ ભારતીય સીમકાર્ડ દ્વારા ભારત ખાતે રહેતા લોકો સાથે ઓનલાઇન ગેમિંગના બહાને ચીટિંગ કરતી હોય છે. જેથી તેઓને ભારતીય સીમકાર્ડની જરૂર રહતી હોય છે. આથી દુબઇ ખાતે રહેતા દિનેશ નામના વ્યક્તિએ તેને પ્રિ-એક્ટિવ સીમકાર્ડ લાવવાનો ઓર્ડર આપ્યો હતો. ત્યારબાદ તે સુરત આવ્યો હતો અને અહીં રહેતા ઉમેશ, રેશમા તથા કેતન નામની વ્યક્તિનો સંપર્ક કરી તેઓને પ્રિ-એક્ટિવ સીમકાર્ડ માટે ઓર્ડર આપ્યો હતો. તેમણે તેને 192 જેટલા પ્રિ-એક્ટિવ સિમકાર્ડની વ્યવસ્થા કરી આપતા આ સીમકાર્ડ લઈ સહદ ફારુક બાગુના સુરતથી ફ્લાઇટમાં દુબઇ જવાનો હતો. પરંતુ ફ્લાઇટ પકડી નીકળે તે પહેલા જ પોલીસે તેમને ઝડપી પાડ્યા હતા.
વધુમાં સુરત ખાતે એક પ્રિ-એક્ટિવ સીમકાર્ડ 1200થી 1400 રૂપિયામાં ખરીદી કરતા હતા અને આ સીમકાર્ડ દુબઇ ખાતે 5 હજારમાં વેચતા હોવાનું પોલીસને જણાવ્યું હતું. હાલ આ સમગ્ર મામલે SOG પોલીસે પકડેલા બંને આરોપીઓને પૂછપરછ કરી તેમના વિરૂદ્ધ મહીધરપુરા પોલીસ મથકમાં જાણવા જોગ ફરિયાદ દાખલ કરી કાયદેસરની કાર્યવાહી હાથ ધરી છે.
