સુરતઃબુધવારઃ લોકસભા સામાન્ય ચૂંટણી-૨૦૨૪ દરમિયાન ચૂંટણી લડતાં ઉમેદવારો તેમજ રાજકીય પક્ષો અંગેની ચૂંટણીલક્ષી માહિતી પ્રિન્ટ-ઈલેકટ્રોનિકસ માધ્યમો સહિત નાગરિકો માટે બહુમાળી ભવન કેમ્પસ સ્થિત આયોજન ભવન ખાતે તૈયાર કરાયેલા મીડિયા સેન્ટરની જિલ્લા ચૂંટણી અધિકારી અને કલેકટર ડો. સૌરભ પારધીએ મુલાકાત લીધી હતી. ઉપરાંત, તેમણે અહીં પ્રથમ માળે જિલ્લા કક્ષાએ ઈલેક્ટ્રોનિક મીડિયા ચેનલોના મોનિટરીંગ માટે કાર્યરત મીડિયા સર્ટીફીકેશન એન્ડ મોનિટરીંગ સેન્ટર (MCMC)ની પણ મુલાકાત લઈ થઈ રહેલી કામગીરીનું નિરીક્ષણ કર્યું હતું અને જરૂરી સૂચનો કર્યા હતા. અધિક જિલ્લા ચુંટણી અધિકારીશ્રીઓ કમલેશ રાઠોડ તથા આર.સી.પટેલ, નાયબ કલેકટર(ચૂંટણી) ડૉ.કૃતિકા વસાવા, મામલતદારશ્રી પ્રતિક જાખડ સહિતના અધિકારીઓ આ વેળાએ ઉપસ્થિત રહ્યા હતા. આ પ્રસંગે ડો.સૌરભ પારધીએ જણાવ્યું હતું કે, આદર્શ આચારસંહિતાનો ચુસ્ત અને યોગ્ય અમલ કરી ન્યાયી અને મુક્ત ચૂંટણી યોજવા માટે જિલ્લા વહીવટીતંત્ર સુસજ્જ બન્યું છે. જિલ્લા ચૂંટણી તંત્ર દ્વારા ઉભા કરાયેલા આ પ્રદર્શન એકમમાં ચૂંટણીલક્ષી તમામ માહિતીનો સમાવેશ કરાયો છે. આ સેન્ટરમાં સામાન્ય નાગરિકો પણ મુલાકાત લઈ શકશે. ઉપરાંત, જેમ જેમ લોકસભા ચૂંટણીની પ્રક્રિયા આગળ વધશે તેમ મીડિયા સેન્ટરમાં તબક્કાવાર અવનવી માહિતીઓ ઉમેરવામાં આવશે. મીડિયા સેન્ટર લોકસભા ચૂંટણીની પ્રક્રિયા પૂર્ણ થાય ત્યાં સુધી કાર્યરત રહેશે. મીડિયા નોડલ અધિકારી અને નાયબ માહિતી નિયામકશ્રી ઉમેશ બાવીસાએ જિલ્લા ચૂંટણી અધિકારીશ્રીને મીડિયાલક્ષી માહિતી અને સ્થાનિક ચેનલોના મોનિટરીંગ અંગેની જાણકારીથી વાકેફ કર્યા હતા. નોંધનીય છે કે, જિલ્લા ચૂંટણી તંત્ર અને પ્રાદેશિક માહિતી કચેરીના ઉપક્રમે બહુમાળી કેમ્પસ ખાતે કાર્યરત મીડીયા સેન્ટરમાં સુરત જિલ્લાની ૧૬ વિધાનસભાની મતદાર વિભાગોની પુરૂષ-મહિલા મતદારોની સંખ્યા, નોડલ અધિકારીઓ અને ચુંટણી અધિકારીઓની ફોન નંબર સહિતની આંકડાકીય વિગતો ફલેક્ષ બેનરોના માધ્યમથી પ્રદર્શિત કરવામાં આવી છે. ઈમરજન્સી નંબરો, વીવીપેટ નિદર્શન માહિતી તેમજ ચૂંટણી આચાર સંહિતા, ૧૮૫૧ થી લઈ ૨૦૧૯ સુધીની લોકસભા ચૂંટણીની આંકડાકીય ઝલક સહિતની અન્ય જાણકારી આ સ્થળેથી માધ્યમોને મળી રહે તેવી વ્યવસ્થા ઉભી કરાઈ છે. સેન્ટરમાં વિવિધ સંપર્ક નંબરો, વેબ સાઈટની માહિતી, જિલ્લાના મતદારો, વિવિધ ઉપયોગી ડિજીટલ પ્લેટફોર્મ્સ, એપ્સની રસપ્રદ જાણકારી પ્રદર્શિત કરવામાં આવી છે.
