સુરત : સુરતના કતારગામ વિસ્તારમાં રહેતી યુવતી સોશિયલ મીડિયાના ઇન્સ્ટાગ્રામ થકી યુવકના સંપર્કમાં આવી હતી અને બંને વચ્ચે પ્રેમ સંબંધ બંધાતા કોર્ટ મેરેજ કર્યા હતા. જોકે પ્રેમી પરિણીત હોવાની જાણ થતા યુવતીએ છૂટાછેડા લઇ લીધા હતા. ત્યારબાદ પણ પ્રેમી દ્વારા વારંવાર પીછો કરી ‘મેં તારી સાથે છુટાછેડાના કરાર પર સહી કરી છે પણ મેં પ્રેમ કરવાનું બંધ નથી કર્યું’, ‘હું તને જ પ્રેમ કરૂ છું અને તારી સાથે જ લગ્ન કરીશ’, જો તું મારી સાથે લગ્ન નહીં કરે તો હું તારા પર એસિડ ફેંકી દઈશ અને તને જાનથી મારી નાખીશ’ તું મારી નહીં થશે તો હું તને બીજા કોઇની પણ થવા દઇશ નહી’. તેવી ધમકીઓ આપતા મામલો કતારગામ પોલીસ મથકે પહોંચ્યો હતો. જેમાં પોલીસે યુવકની ધરપકડ કરીને આગળની કાર્યવાહી હાથ ધરી છે.
મળતી માહિતી મુજબ સુરતના કતારગામ વિસ્તારમાં રહેતી 25 વર્ષીય યુવતી વર્ષ 2022માં સોશિયલ મીડિયા થકી ગૌરવ જગદિશભાઇ પાટીલના સંર્પકમાં આવી હતી. બંને વચ્ચે મિત્રતા બાદ ડિસેમ્બર-2022માં કોર્ટ મેરેજ કર્યા હતા. લગ્ન બાદ ગૌરવ યુવતીને તેના ઘરે લઇ ગયો ન હતો. જેથી યુવતી પોતાના ઘરે રહેતી હતી. આ દરમિયાન યુવતીને ગૌરવ પરિણીત હોવાની જાણ થતાં તેણીએ ‘હવે પછી કોઈ સંબંધ રાખવા નથી’ તેમ કહેતા ગૌરવે ‘મારી પત્ની સાથે કોઈ સબંધ નથી’ તેમ કહ્યું હતું અને યુવતીને પોતાની સાથે ઘરેથી ભાગીને અલગ રહેવા દબાણ કરતો હતો, પરંતુ યુવતીએ ઘરેથી ભાગીને તેની સાથે રહેવાની ના કહી દીધી હતી. ગૌરવને નશો કરવાની ટેવ હોવાથી તેના પરિવારજનોએ તેને બારડોલી ખાતે નશા મુક્તિ કેન્દ્રમાં મોકલી દીધો હતો. તે વખતે ગૌરવની માતા અને ભાઈ યુવતીના ઘરે પહોંચીને ઝઘડો કર્યો હતો. જેથી યુવતીએ આ અંગે કતારગામ પોલીસ મથકમાં ફરિયાદ કરતા પોલીસ મથકમાં માફી માંગી ગૌરવ પણ હવે કનડગત નહી કરે તેમ કહેતા સમાધાન થયું હતું અને ગત 3 જુલાઈ 2023ના રોજ નોટરી સમક્ષ છુટાછેડાનો કરાર કરી યુવતીએ તમામ સંબંધ પૂર્ણ કરી દીધા હતા.
જોકે છૂટાછેડાના પંદર દિવસ બાદથી ગૌરવે ફરીથી યુવતીનો પીછો કરવા લાગ્યો હતો અને ‘મેં તારી સાથે છુટાછેડાના કરાર પર સહી કરી છે પણ મેં પ્રેમ કરવાનું બંધ નથી કર્યુ’, ‘હું તને જ પ્રેમ કરૂ છું અને તારી સાથે જ લગ્ન કરીશ’, ‘જો તું મારી સાથે લગ્ન નહીં કરે તો હું તારા પર એસિડ ફેંકી દઈશ અને તને જાનથી મારી નાખીશ’, ‘તું મારી નહીં થશે તો હું તને બીજા કોઇની પણ થવા દઇશ નહી’. તેવી ધમકીઓ આપી હતી તેમજ યુવતીના ફોટા પણ સોશિયલ મિડીયામા વાયરલ કરી બદનામ કરવાની ધમકીઓ આપી હતી. જેથી આખરે આ મામલે યુવતીએ કતારગામ પોલીસ મથકમાં ફરિયાદ નોંધાવતા પોલીસે 29 વર્ષીય ગૌરવ જગદિશભાઇ પાટીલની ધરપકડ કરી કાયદેસરની કાર્યવાહી હાથ ધરી હતી.