સુરત : સુરતમાં સિંગણપોર પોલીસ મથકમાં કોન્સ્ટેબલ તરીકે ફરજ બજાવતી મહિલાએ પોતાના ઘરે ગળેફાંસો ખાઈ આપઘાત કર્યો હોવાની ઘટના સામે આવી છે. મહિલા કોન્સ્ટેબલે સુસાઇડ કરતાં પહેલાં લખેલી સુસાઇડ નોટ પોલીસને મળી છે, જેમાં તેણે પોતાની માતાને ઉદ્દેશીને લખ્યું છે કે અજાણી વ્યક્તિ પર ભરોસો મૂકવો જોઈતો નહોતો. આ બનાવ અંગે સિંગણપોર પોલીસ ઘટનાસ્થળે પહોંચી તપાસ હાથ ધરી છે.
સુરતના સિંગણપોર વિસ્તારમાંથી આત્મહત્યાની એક ઘટના સામે આવી છે. પોલીસ ખાતામાં ફરજ બજાવતી મહિલા કોન્સ્ટેબલે આત્મહત્યા કરી હોવાની ઘટના બનવા પામી છે. સિંગણપોર પોલીસ સ્ટેશનમાં ફરજ બજાવતી મહિલા કોન્સ્ટેબલ હર્ષાબેન ચૌધરીએ પોતાના ઘરે ગળેફાંસો ખાઈ આપઘાત કરી લીધો છે.
પ્રાપ્ત વિગતો મુજબ સિંગણપોર પોલીસ સ્ટેશનમાં છેલ્લા થોડા સમયથી મહિલા કોન્સ્ટેબલ તરીકે હર્ષાબેન ચૌધરી ફરજ બજાવી રહ્યાં હતાં. હર્ષાબેન ચૌધરી સિંગણપુર વિસ્તારમાં આવેલા મહેશ્વરી પેલેસ એપાર્ટમેન્ટમાં રહેતાં હતાં. ત્યારે આજે તેમણે તેમના ઘરના રૂમમાં ગળેફાંસો ખાઈ આપઘાત કર્યો હતો. પોલીસે જણાવ્યું હતું કે મહિલા કોન્સ્ટેબલ હર્ષાબેન ચૌધરી ગત રાત્રિ સુધી સિંગણપોર પોલીસ સ્ટેશન ખાતે ફરજ પર હાજર હતાં. ત્યાર બાદ આજે તેઓ પોલીસ સ્ટેશન ખાતે ફરજ પર આવ્યાં નહોતાં. એને લઇ તેમનો સંપર્ક કરવામાં આવતાં સંપર્ક થઈ શક્યો નહોતો. આ દરમિયાન પોલીસ દ્વારા તપાસ કરતાં મહિલા કોન્સ્ટેબલ હર્ષાબેન ચૌધરીનો તેના રૂમમાંથી પંખા પર લટકેલો મૃતદેહ મળી આવ્યો હતો. ઘરે કોઈ હાજર નહોતું ત્યારે હંસાબેન ચૌધરીએ પોતાના રૂમમાં ગળેફાંસો ખાય આપઘાત કરી લીધો હતો.
આ બનાવ અંગે પોલીસને જાણ થતાં સિંગણપોર પોલીસ સહિત ઉચ્ચ પોલીસ અધિકારીનો કાફલો ઘટનાસ્થળે દોડી આવ્યો હતો. પોલીસે મહિલા કોન્સ્ટેબલના મૃતદેહને પોસ્ટમોર્ટમ ખાતે સ્મિમેર હોસ્પિટલ ખાતે ખસેડ્યો હતો અને આ બનાવ અંગે તેના પરિવારને જાણ કરી જરૂરી તપાસ હાથ ધરી હતી. મહિલા કોન્સ્ટેબલના આપઘાત બાદ ઘટનાસ્થળે પહોંચેલી પોલીસે તપાસ હાથ ધરતાં મહિલા કોન્સ્ટેબલના રૂમમાંથી પોલીસને એક સુસાઇડ નોટ મળી આવી હતી. મહિલા કોન્સ્ટેબલે લખેલી સુસાઇડ નોટને પોલીસે કબજે કરી છે. ત્યારે આ અંગે એસીપી લક્ષ્મણસિંહ ઝાલાએ જણાવ્યું હતું કે મહિલા કોન્સ્ટેબલ હર્ષાબેન ચૌધરીએ સુસાઇડ નોટ પોતાની માતાને ઉદ્દેશીને લખી છે, જેમાં તેણે કહ્યું છે કે અજાણી વ્યક્તિ પર વિશ્વાસ મૂક્યો એ મારી ભૂલ હતી. ત્યારે હાલ મહિલા કઈ વ્યક્તિની વાત કરતી હતી એની જાણ પોલીસની થઈ શકી નથી. પોલીસે સુસાઇડ નોટના આધારે આગળની તપાસ હાથ ધરી છે.