સુરત : સુરતના અમરોલી વિસ્તારમાં રહેતા પરપ્રાંતીય પરિવારની 14 વર્ષીય તરુણી ભેદી રીતે ગુમ થઈ હતી. તરુણીને બ્યૂટિપાર્લરના ધંધામાં રૂ. 25થી 30 હજારની કમાણીની લાલચ આપી ટૂંકા કપડામાં વીડિયો ઉતારી વાઇરલ કરવાની ધમકી આપવામાં આવી હતી. આ સાથે રાજસ્થાનના ડેગાણા ખાતેની હોટલમાં લઈ જઈ દેહવિક્રયનો ધંધો કરાવ્યાનો પર્દાફાશ કરી અમરોલી પોલીસે માસ્ટર માઈન્ડ દંપતી સહિત પાંચની ધરપકડ કરી છે. પ્રાપ્ત માહિતી મુજબ અમરોલી વિસ્તારમાં રહેતા યુપીના પરિવારની 14 વર્ષીય વર્ષા (નામ બદલ્યું છે) ગત 8 માર્ચના રોજ ભેદી સંજોગોમાં ગુમ થઈ જતા પોલીસે અપહરણનો ગુનો નોંધી તપાસ હાથ ધરી હતી. પોલીસે 26 વર્ષીય મોનીરાખાતુન ઉર્ફે જ્યોતિ સાકીલ હલદરની ધરપકડ કરી હતી. મોનીરાખાતુનની પૂછપરછમાં ભેદી સંજોગોમાં ગુમ થયેલી તરુણીને દેહવિક્રયના ધંધો કરાવ્યાનું બહાર આવતા પોલીસ ચોંકી ગઈ હતી. પોલીસે 28 વર્ષીય માસ્ટર માઇન્ડ સૈદુલ મોલ્લા મુનાબ્બાર મોલ્લા સાલોમ અને તેની 25 વર્ષીય પત્ની મોહીમા મોલ્લા ઉર્ફે રિયા સૈદુલ મોલ્લા મુનાબ્બાર ઉપરાંત 21 વર્ષીય રાહુલ રામસ્વરૂપ ટેલર, 24 વર્ષીય સમીર સલીમ કુરેશી અને 30 વર્ષીય આરીફસાદીક ખાનની રાજસ્થાન ખાતેથી ધરપકડ કરી હતી. વર્ના કાર અને ડીવીઆર પણ કબ્જે લીધું છે. મોહીમાએ વર્ષાને બ્યૂટિપાર્લરના કામમાં રૂ. 25થી 30 હજારની કમાણી છે તેવી લાલચ આપી પોતાની સાથે મોનીરાખાતુનની રહેણાંક રૂમમાં લઈ ગઈ હતી. જ્યાં ટૂંકાં કપડાંમાં વર્ષા પાસે ડાન્સ કરાવી તેનો વીડિયો ઉતારી વાઇરલ કરવાની ધમકી આપી ટ્રાવેર્લ્સમાં રાજસ્થાનના નાગોર જિલ્લાના ડેગાણા લઈ ગયા હતા. જ્યાં હોટલ મેનેજર સલીમ કુરેશીએ ગ્રાહક મોકલાવી દેહવિક્રયનો ધંધો કરાવ્યો હોવાનું બહાર આવ્યું હતું. પોલીસે સૈદુલ, તેની પત્ની મોહીમા, રાહુલ, સમીર અને આરીફની ધરપકડ કરી હતી. જ્યાં દિપેશ દવેએ ડેગાણાની જે હોટલમાં દેહવિક્રયનો ધંધો કરાવ્યો હતો. ત્યાં કોણે કોણે વર્ષા સાથે દુષ્કર્મ કર્યુ હતું, અન્ય કેટલી તરૂણી કે યુવતીને આ રીતે કામની લાલચ આપી ફસાવી છે અને આ ધંધામાં અન્ય કોણ કોણ સામેલ છે તે મુદ્દે તપાસ કરવામાં આવી રહી છે. બ્યુટી પાર્લરના કામના બહાને તરુણીને રાજસ્થાનના નાગોર જિલ્લાના ડેગાણા લઈ ગયા હતા. જ્યાં વૃંદાવન હોટલમાં મેનેજર સલીમ કુરેશીની સાંઠગાંઠમાં ગ્રાહકોએ દુષ્કર્મ કર્યુ હતું. મેનેજર સલીમની પૂછપરછમાં હોટલના માલિક ડો. અમીત ચૌધરી છે અને તેઓ ભાડેથી ચલાવે છે. પરંતુ તેની પાસેથી કોઈ ભાડા કરાર કે અન્ય કોઈ પૂરાવા મળ્યા નથી. જ્યારે વર્ષાને રાજસ્થાન લઈ જઈ દેહવિક્રયના ધંધામાં ધકેલનાર સૈદુલ મોલ્લા અને તેની પત્ની મોહીમાએ તેઓના આ ધંધામાં તેમની ઉપર સાહીબ સૈયદ હોવાની કબૂલાત કરી છે. જેથી પોલીસે સાહીબ સૈયદની પણ શોધખોળ હાથ ધરી છે. વર્ષાને બ્યૂટિપાર્લરના કામની લાલચ આપી દેહવિક્રયના ધંધામાં ધકેલનાર મોલ્લા દંપતી તરુણી અને યુવતીઓને તેઓના આધારકાર્ડ પણ બનાવી આપવાની લાલચ આપતા હતા. જેથી તેઓ કયા અને કોની પાસે આધારકાર્ડ બનાવતા હતા તે અંગે પણ તપાસ શરૂ કરી છે. બીજી તરફ મહત્વની બાબત એ છે કે વર્ષાનો ટૂંકાં કપડાંમાં જે મોબાઈલમાં ફોટા પાડી વીડિયો ઉતાર્યા હતા તે બગડી ગયો હોવાનું સૈદુલ મોલ્લા રટણ કરી રહ્યો છે.
